Grillað maís á stöngli

sá þessa einföldu aðferð á Vinotek.is sem gefur frábært og safaríkt korn á stöngli, Við notuðum neðri aðferðina, geggjað gott 
Lengi vel var einungis hægt að fá keyptar frosnar maísstangir hér á landi. Það er sem betur fer liðin tíð og nú er hægt að fá ferskan maís í blöðum, sem er hreinasta sælgæti þegar búið er að grilla hann.

Best er að hreinsa ystu blöðin utan af maísinum og snyrta hann til. Þá þarf að láta maísinn liggja í vatni í um 10 mínútur áður en hann er grillaður. Þá sjúga blöðin í sig vökvann sem verður til þess að maísinn sýður innaní þegar þegar þau koma á grillið.

Allra best er hins vegar að gera eftirfarandi: Látið maísinn liggja í vatni í um tíu mínútur. Skerið síðan endana af, flettið blöðunum varlega frá og hreinsið stöngulinn vel af tægjunum sem eru innst. Penslið stöngulinn með ólívuolíu, saltið og kryddið með t.d. þurrkuðu oregano. Vefið blöðunum aftur varlega utan um stöngulinn og grillið í um 15 mínútur.

Best er að snúa maísinum að minnsta kosti einu sinni svo að hann brenni ekki.

Berið síðan fram eitt og sér með smjöri og salti eða sem meðlæti með góðri steik.